Plantun de Prouvènço

Pèr coumpara dos planto d'encò nostre

Angelica sylvestris & Valeriana officinalis subsp. sambucifolia

Cournacho

Angelica sylvestris

Apiaceae Umbelliferae

Àutri noum : Angelico-fèro, Angelico.

Noms en français : Angélique sauvage, Angélique des bois.

Descripcioun :
La cournacho es uno forto planto di gràndi fueio coumpausado, dous cop penado e peréu di brout (oumbello) di grand. Se recounèis à si guèno de cambo proun larjo e à si fru peréu bèn ala. La cambo èi boutisso. Trachis dins li mitan umide..

Usanço :
Es uno planto que pòu èstre manjado emai siegue pas uno usanço couneigudo au nostre : li fueio dins l'ensalado e li grano en pastissarié. A passa tèms la cournacho èro vist en Éuropo coum'uno planto magico. L'angelico-fèro sarié estado apourtado pèr un ange à un mounge pèr ié dire si vertu : coucharié lou diable, sougnarié li mourdeduro de bèsti, apararié lis enfant e farié s'enfugi la pèsto ! Èi pamens vertuouso, vèire çai-souto.

Port : Grando erbo
Taio : 0,7 à 2 m
Fueio : coumpausado
Tipe bioulougico : Emicriptoufite
Cicle bioulougico : Renadivo mounoucarpico

Gènre : Angelica
Famiho : Apiaceae
Famiho classico : Umbelliferae

Ordre : Apiales

Coulour de la flour : Blanco
Petalo : 5
Ø (o loungour) enflourejado : 9 à 26 cm
Flourido : Estiéu - Autouno

Sòu : Ca
Autour basso e auto : 0 à 1700 m
Aparado : Noun
Juliet à óutobre

Liò : Prado umido - Ribiero - Lauroun
Estànci : Subremediterran à Mountagnard
Couroulougi : Éurasiatico
Ref. sc. : Angelica sylvestris L., 1753

Valeriano

Valeriana officinalis subsp. sambucifolia

Caprifoliaceae Valerianaceae

Noms en français : Valériane à feuilles de sureau, Valériane officinale.

Descripcioun :
La valeriano es uno grando planto (1,5 à 2,5 m) que trachis dins li relarg mountagnous. Se recounèis à si fueio coumpausado (la souleto espèci coume acò) ; li d'en bas an de 5 à 9 fuioun en formo de lanço e denta. Se destrìo de Valeriana officinalis subsp. officinalis pèr lou noumbre de fueioun e la loungour de la corollo qu'èi mai longo (> 5mm).

Usanço :
La planto èi couneigudo despièi li Grè pèr èstre proun vertuouso majamen contro li proublèmo de som, d'ànci, de reboulimen, pèr apasima li nèrvi e autre. Ei subretout la racino que s'utiliso (en tisano).